Harsch, Roland: Dat grousst Féissbuch

Léif Kolleginnen a Kollegen,De Roland Harsch huet ee Buch iwwer se, a fir se, geschriwwen, ee Buch iwwer glécklech, fräilafend Féiss (garantéiert keng Käfeghaltung), hir Heldendoten, hir Exkursen an d'Konscht an an d'Literatur, hir Schanddoten, eben iwwer Féiss, déi eewichtegen Impakt op eis Gesellschaft, eis Kultur an op eis selwer hunn schliisslech bréngen d'Féiss eis iwwerall hin a wëssen dacks besser wéi de Kapp, wou dat soll sinn.Illustréiert goufen dës humorvoll a léierräich Episoden aus der Welt vun de Féiss vum Michel Geimer, dee mat dësem Buch seng Léift zu sengen eegenen a friemen Zéiwen entdeckt huet.De Roland Harsch krut de Servaispräis a sëlleg aner national an international Präisser.Am Ufank gouf et e Wuert als Irritatioun:FACEBOOK. Op Lëtzebuergesch verstinn ech noutgedronge FÉISSBUCH. Dat wor den Ausléiser, den déclic, oder de gudde Fouss hannebäi.Ech weess net, wat fir een Däiwel (mat oder ouni Klompfouss) mech geridden hat, ma a kuerzer Zäit konnt ech en Index, en Inhaltsverzeechnes zu Pabeier brénge mat enger Kapiteliwwersiicht zu engem fiktive Buch iwwert d'Féiss.